இடுக்குவான் குந்து எனப்படும் மூன்று நாள் காய்ச்சல்

	நோய்க்கான காரணம்
	இடுக்குவான் குந்து எனப்படும் நோய் பசு மற்றும் எருமை மாடுகளைத் தாக்கக்கூடிய  வைரஸால் ஏற்படும் நோயாகும். ஆறு மாதம் முதல் இரண்டு வயதுடைய மாடுகள் இந்நோயால் அதிகம் பாதிக்கப்படுகின்றன.இந்நோய் ஏற்படுத்தும் வைரஸ் ரேப்டோவைரஸ் குடும்பத்தைச் சார்ந்தது.

நோய் பரவும் முறை
சேண்ட் ஃபிளை எனும் பறக்கும்பூச்சிகள் வழியாக  இந்த நோய் பரவுகிறது. குயூலெக்ஸ்,குயூலிகாய்டஸ் ரகத்தினைச்  சேர்ந்த கொசுக்கள்  மூலமாகவும் இந்த நோய் பரவுகிறது. கால்நடைகளின் நேரடித் தொடர்பு மூலமாகவோ அல்லது  கால்நடைகளின்  எச்சில்,சளி மூலமோ இந்நோய் பரவுவதில்லை. காற்றின் மூலமாக  இந்த நோய் ஏற்படுத்தும் வைரஸ் விரைவில் பரவுகிறது. ஐந்து மாத கால இடைவெளியில் இந்த வைரஸ் 3000 மைல்கள் பரவியதாகக் கண்டறியப்பட்டுள்ளது. நோய் ஏற்படுத்தும் வைரஸ் மாடுகளின் உடலுக்குள் சென்ற 5ம் நாள் மாடுகளின் இரத்தத்தில் இருக்கும்.கொசுக்கள் மற்றும் இதர  பூச்சிகள் மாடுகளைக் கடிப்பதன் மூலம் இந்நோயைப் பரப்புகின்றன. நோயின் தாக்குதலுக்குள்ளாகும் கால்நடைகளில் 0.002 மிலி இரத்தம்  நோயினை உண்டாக்கப் போதுமானது. நோயினால் பாதிக்கப்பட்டு, நலமடைந்த கால்நடைகளில் இந்த வைரஸ் இருக்காது. ஆனால் சில விலங்குகள் இந்நோயினை ஒரு பருவநிலைக் காலத்திலிருந்து மற்றொரு பருவ நிலைக்கு பரப்புகின்றன என்ற கருத்தும் நிலவுகிறது. பாதிக்கப்பட்ட மாடுகளின் இரத்தத்தை மற்ற மாடுகளுக்குச் செலுத்துவதால்  இந்நோய் பரவும்.

	நோயின் அறிகுறிகள்
இந்நோயினால் பாதிக்கப்பட்ட மாடுகளின் உடல் வெப்பநிலை மிகவும் அதிகரிக்கும். உடல் மற்றும் தசைகளில்  நடுக்கம். பாதிக்கப்பட்ட மாடுகள் நடக்க மிகவும் சிரமப்படுதல்.வலுக்கட்டாயமாக மாடுகளை நடக்க வைக்கும்போது மிகவும் சிரமப்பட்டு வளைந்த முதுகுடன் நடத்தல். மாடுகளில் தீவனம் எடுப்பது மிகவும் குறைதல்  மேலும் பால் உற்பத்தியும் கணிசமாகக் குறைதல் வாயில் அதிகப்படியான உமிழ்நீர் சுரப்பு, மூக்கில் சளி வடிதல்,  கண்ணில் நீர் வடிதல். பாதிக்கப்பட்ட மாடுகளின் தசைகள் கடினமாக, விரைப்பாக இருப்பதுடன், வலியும் காணப்படுதல் பாதிக்கப்பட்ட மாடுகள் நொண்டிக்கொண்டு நடத்தல். மிகவும் பாதிக்கப்பட்ட மாடுகள் பின்னங்கால்கள் விரைப்புடன் கீழே படுத்துக்கொள்ளுதல். நோய்  அறிகுறிகள் வெளிப்பட்ட  சில மணி நேரங்களில் கால்கள் பாதிக்கப்பட்டு மாடுகள் நொண்டிக்கொண்டிருத்தல். நோயினால் பாதிக்கப்பட்டு படுத்திருக்கும் மாடுகளில் அசைபோடுதல் பாதிக்கப்பட்டு வலியால் முனகிக்கொண்டும், பற்களைக் கடித்துக்கொண்டும் இருத்தல்.

நோயினைக் கட்டுப்படுத்துதல்
நோயினைப் பரப்பும் பூச்சிகளைக் கட்டுப்படுத்துவதே நோயினைக்  கட்டுப்படுத்தும் முதல் நடவடிக்கையாகும். தற்போது இந்நோயினைத் தடுப்பதற்கு எந்தவொரு தடுப்பூசியும் இல்லை.